تعوا نتذكر سوريه سوا ..
الأربعاء 12 / 7 / 2017 م
الأردن العربي – احرار مارع:
تعوا نتذكر سوريه سوا ..
سوريه يعني …… لعبة طابة بالحارة والنتيجة 23- 26
سوريه آكلة فول يومالجمعه بأقل من 50
سوريه كاسة السكر + 5 ليرات بتاخود كيس غزل البنات
سوريه برمضان تدق عجيرانك تقلون امي اشتهتلكن هالطبخة
سوريه تدق عجارك تقلو بدي رغيف خبز نقطعنا يعطيك ربطة
سوريه رمضان كريم من جرس الكنيسة
سوريه ميلاد مجيد من مآدنة الجامع
سوريه شب بياكل اتلة لانو لطش بنت
سوريه كاسة تمر هندي من البياع يلي لابس عربي
سوريه العراضة والسيف والترس
سوريه وطي الصوت جارنا مريض ما حلوة
سوريه شب ماسك ايد ختيار وعم يقطعو الشارع
سوريه نفس اركيلة وكاسة مته ودربكه حلوه عالكورنيش
سوريه تفيق عصوت فيروز وفنجان القهوة
سوريه تسمع اصابيع الببو يا خيار وغاز غاز وعالمكسر يا بطيخ هههه
سوريه العرس لـ 4 الصبح
سوريه العيد من قبل يوم الوقفة لخامس يوم
ولك شو بدي احكي لاحكي والله بدا كتب لتوصف سوريه
سوريه الام يلي بتلم والاب يلي بيربي
سوريه جنة الله على الارض
لك الله يعافي جروحك يا وطني ..
لاتوقفها عندك ..
ما هي سوريا ؟!
هي حديث الصحف و الأخبار
و الخبر العاجل يلي صرنا نشوفو ليل نهار
و الحيرة يلي بتخوفنا اذا كان الوضع هادي
هي البيوت يلي فضيت و هربوا منها السكان
شي مات و شي اتغرب و شي اتشرد بالشارع و انهان
هي قلب محروق و عم يبكي و يقول شو صار فيكي يا بلد
و ناس مجروحة و عم تشكي شقى عمرها يلي ضاع للأبد
هي نازح و لاجئ و مهجر
و بيت مسروق و محل مدمر
هي الحسرة و الحنين لأيام زمان
و للمحبة و راحة البال و نعمة الأمان
هي الشام بالليل معتمة و حزينة
و بالنهار الدخنة معبية سما المدينة
هي خاطر مكسور و دمعة بالعين
و ألم و هم البال شاغلين
هي بسمة و راحة صارو عملة نادرة
و من الوجع الوجوه عالضحك مو قادرة
هي فرحة تخرجي يلي كنت عم أحلم فيها من سنين و بلحظة ضاعت
و كأنو أحلامي و نطرتي لهل اليوم كلها وهم كانت
هي عمي يلي مات و بسبب الأزمة اندفن بالغربة
مع أنو كل عمرو كان يوصي يندفن مع جدي بالتربة
هي الشوق لصحابنا و حبابنا يلي صارو بعاد
و لأيام البسط و الجمعات يلي راحت و ما عاد تنعاد
هي و بالرغم من كل شي حكيتو بتضل عزيزة
و عشقها و التمسك فيها بالنسبة إلي غريزة
هي حبي و ملاذي مهما الزمن جار
و بإذن الله رح ابقى فيها لو شو ما صار
رح أبقى عأمل يكون بكرا أحلى و الغياب يرجعو و ترجع البلد تملى
رح أبقى عأمل الغيمة السودا تمشي و تنزل المطر و تغسل كل شي
و بالأخير رح أبقى على يقين أنو كل شي حصل لخير و حتفرج بإذن رب العالمين